Čilgehus

1. Juohke joavku oažžu spillabreahta, dilemmakoarttaid, gažaldatkoarttaid ja spillanjuolggadusaid (maid oahpaheaddji lea máŋgen). Oahpaheaddji sáhttá maid vejolaččat čuohppat eret gažaldat- ja dilemmakoarttaid ovdagihtii, nu ahte oahppit eai oainne gažaldagaid ja dilemmaid ovdal go spilla álgá. Dahje oahppit sáhttet ieža čuohppat koarttaid eret ovdal go spilla álgá.

2. Oahpaheaddji bagada movt oahppit galget spillet.

• Gažaldatkoarttat ja dilemmakoarttat sirrejuvvojit ja biddjojuvvojit goabbat guhpan nu ahte teaksta lea vulos guvlui.
• Spillenboalut biddjojuvvojit álgui, ja oahppit mearridit birccuin gii galgá álgit.
• Spilla álggahuvvo dainna ahte son gii galgá álgit, bálkesta birccu ja sirdá boalu nu máŋgga geardde ovddos guvlui go maid bircu čájeha.
• Jus oktage bisána ovtta gažaldatsuorgái, de galgá muhtin gean vuostá spille, geassit bajimus gažaldatkoartta ja lohkat gažaldaga jitnosit sutnje gii lea gažaldatsuorggis.
• Jus son máhttá riekta vástidit, de beassá ođđasis bálkestit. Jus vástida boastut, de ferte vuordit ovtta vuoru.
• Jus oktage bisána dilemmasuorgái, de galgá son geassit ovtta dilemmakoartta man lohká jitnosit earáide.
• Dasto galgá son vuordit ovtta vuoru, man botta galgá jurddašit makkár doaibmamolssaeavttu vállješii čoavddusin dilemmai.
• Ovdal go son fas bálkesta birccu, de ferte muitalit earáide makkár čovdosa son vállje, ja čilget manne dat lea buoremus su mielas.
• Jus oktage spillejeddjiin vállje “juoidá eará” -čovdosa, de ferte muitalit movt su mielas dilemma baicca galggašii čoavdit.
• Jus oktage spillejeddjiin boahtá dakkár suorgái mas čuožžu “sirdde guovtte geardde maŋos guvlui” dahje “bálkes ođđasis”, de galgá son dahkat nu movt suorggis čuožžu.
• Vuosttaš gii olle mollii, vuoitá.